Mae gyrwraig wedi’i dedfrydu i ddeg mis o garchar, a’i gwahardd rhag gyrru am 20 mis, yn dilyn ei gweithredoedd ar 21 Chwefror 2023.
Canfu Jolanta Motiejuniene, 48 oed, o Lesley Street, Port Talbot, yn euog o Achosi Anaf Difrifol drwy Yrru Diofal/Anystyriol yn dilyn treial, a chafodd ei dedfrydu ddydd Gwener 12 Medi 2025 yn Llys y Goron, Abertawe.
Roedd Motiejuniene yn casglu dros elusen ar 21 Chwefror 2023 yn Waun Burgess, Caerfyrddin – gan yrru fan Mercedes Sprinter, pan ddigwyddodd y gwrthdrawiad difrifol ychydig ar ôl 11 o’r gloch y bore hwnnw.
Roedd y ferch, a oedd yn bedair oed ar y pryd, yn reidio beic ar yr ystâd, pan wrthdarodd y fan, a oedd yn cael ei gyrru gan Motiejuniene, â hi, gan wneud iddi ddioddef anaf pen difrifol – y mae’n parhau i ddod drosto.
Cafodd ei dedfrydu i ddeg mis o garchar, a’i gwahardd rhag gyrru am 20 mis.
Dywedodd teulu’r plentyn: “Ddwy flynedd yn ôl, trowyd ein bywydau wyneb i waered oherwydd yr anafiadau a achoswyd i’n merch hardd. Rydyn ni wedi tystio i, a dioddef, trawma na ddylai’r un rhiant ddioddef, a allai fod wedi’i osgoi pe bai’r yrwraig yn edrych ble’r oedd hi’n mynd.
“Rydyn ni’n fythol ddiolchgar i Farnwr Llys y Goron, y Rheithgor, Bargyfreithiwr yr Erlyniad a Heddlu Dyfed-Powys am gael y cyfiawnder mae’n haeddu i’n merch. Diolchwn hefyd i staff GIG yn ysbytai Glangwili ac Arch Noa, criw’r Ambiwlans Awyr, ffisiotherapyddion ein merch, a’n teulu a’n ffrindiau, y mae eu cymorth a’u cariad wedi’n helpu drwy ddwy flynedd ofidus a thrawmatig iawn.”
Dywedodd Cwnstabl Lucy Peppiatt o Uned Ymchwilio i Wrthdrawiadau Difrifol Heddlu Dyfed-Powys: “Rydyn ni’n croesawu dedfryd Motiejuniene. Fe wnaeth ei gyrru diofal y diwrnod hwnnw arwain at anafu plentyn ifanc iawn yn ddifrifol mewn gwrthdrawiad yr oedd modd ei osgoi.
“Mae’r ddedfryd hon yn mynd rhywfaint o’r ffordd tuag at sicrhau cyfiawnder, ac rydyn ni hefyd yn gobeithio ei bod yn atgoffa gyrwyr am ganlyniadau difrifol gyrru mewn modd diofal ac anystyriol – gan roi cerddwyr bregus mewn perygl.”
