Mae partneriaeth rhwng Rygbi’r Scarlets ac Elusennau Iechyd Hywel Dda wedi helpu i godi £50,000 ar gyfer plant a phobl ifanc â chyflyrau sy’n cyfyngu ar fywyd ac yn bygwth bywyd ledled canolbarth a gorllewin Cymru, gyda’r cydweithrediad i barhau am flwyddyn arall.
Ers dod yn bartner ymgyrchu pan lansiwyd y Gronfa Ddymuniadau yn 2022, mae Rygbi’r Scarlets wedi chwarae rhan allweddol wrth godi ymwybyddiaeth o’r ymgyrch, gan helpu i ennill cefnogaeth i deuluoedd sy’n cael eu gofalu amdanynt gan dîm Gofal Lliniarol Pediatrig Bwrdd Iechyd Prifysgol Hywel Dda.
Mae’r £50,000 a godwyd hyd yma wedi ariannu ystod eang o brofiadau a gweithgareddau cofiadwy, gan greu eiliadau arbennig ac atgofion parhaol i blant, pobl ifanc a’u teuluoedd. Mae’r rhain wedi cynnwys ymweliadau â Gardd Fotaneg Genedlaethol Cymru, yr Urdd yn Llangrannog a’r Celtic Manor, yn ogystal ag adnoddau chwarae therapiwtig, pecynnau lles i frodyr a chwiorydd, a gweithgareddau teuluol a gynlluniwyd i ddod â phobl atynt eu gilydd.
Fel rhan o’r bartneriaeth, mae teuluoedd a gefnogir gan y Gronfa Ddymuniadau hefyd wedi mwynhau ymweliadau am ddim â gemau’r Scarlets, tra bod y clwb wedi helpu’n rheolaidd i hyrwyddo’r ymgyrch mewn gemau cartref drwy weithgareddau ymwybyddiaeth a chodi arian pwrpasol.
Dywedodd Rachel Brown, Arbenigwr Chwarae Gofal Lliniarol Pediatrig: “Mae’r gefnogaeth rydym wedi’i chael gan y Scarlets ers lansio’r Gronfa Ddymuniadau wedi bod yn anhygoel. Mae cyrraedd y garreg filltir o £50,000 yn gyflawniad rhyfeddol ac yn adlewyrchu haelioni cefnogwyr ar draws ein cymunedau.
“Mae pob punt a godir yn ein helpu i ddarparu profiadau a chyfleoedd sy’n mynd y tu hwnt i’r hyn y gall y GIG ei ariannu. Boed yn ddiwrnod teuluol arbennig, cefnogaeth i frodyr a chwiorydd neu weithgareddau sy’n helpu teuluoedd i dreulio amser gwerthfawr gyda’i gilydd, mae’r effaith yn wirioneddol sylweddol.
“Rydym wrth ein bodd y bydd y Scarlets yn parhau i gefnogi’r Gronfa Ddymuniadau ac yn ein helpu i greu hyd yn oed mwy o atgofion arbennig i deuluoedd yn y blynyddoedd i ddod.”
Ychwanegodd capten y Scarlets, Josh Macleod: “Rydym yn hynod falch o barhau â’n partneriaeth i gefnogi’r Gronfa Ddymuniadau. Mae gweld y gwahaniaeth y mae’n ei wneud i deuluoedd lleol yn ysbrydoledig, ac mae cyrraedd cyfanswm o £50,000 yn garreg filltir wych.
“Fel clwb, rydym wedi ymrwymo i gefnogi ein cymunedau ac rydym yn edrych ymlaen at helpu’r ymgyrch i dyfu ymhellach fyth. Gobeithiwn y bydd cefnogwyr yn parhau i gefnogi’r Gronfa Ddymuniadau a’n helpu i wneud gwahaniaeth gwirioneddol i fywydau plant.” Mae’r Gronfa Ddymuniadau yn cefnogi plant a phobl ifanc sy’n byw gyda chyflyrau sy’n cyfyngu ar fywyd ac yn bygwth bywyd, gan helpu i ddarparu cyfleoedd, profiadau ac eiliadau o lawenydd iddynt hwy a’u teuluoedd yn ystod cyfnodau heriol.
I gael rhagor o wybodaeth am y Gronfa Ddymuniadau neu i wneud cyfraniad, ewch i: https://elusennauiechydhyweldda.gig.cymru/ymgyrchoedd-a-digwyddiadau/y-gronfa-dymuniadau/
