Ysgrifennodd a chyhoeddodd Margaret Davies lyfr o gerddi o’r enw Memories a chodwyd £2,024 ar gyfer yr Uned Ddydd Cemotherapi yn Ysbyty Tywysog Philip.
Mae Margaret, sy’n deipydd llaw-fer wedi ymddeol i Gyngor Bwrdeistref Llanelli a Bwrdd Dŵr Cymru, wedi bod yn ysgrifennu’r cerddi ers 1985. Cododd yr arian i’r uned er cof am ei mab, Teifion Wyn Davies.
Dywedodd Margaret: “Diolch i bawb sydd wedi bod mor garedig â chefnogi a phrynu fy llyfr i gefnogi Elusennau Iechyd Hywel Dda gyda rhodd i’r Uned Ddydd Cemotherapi yn Ysbyty Tywysog Philip, sy’n agos at fy nghalon.
“Roeddwn i wrth fy modd i gael cyhoeddi fy llyfr. Ar ôl dod yn fwy ansymudol, roedd gennyf fwy o amser ac eisiau dod yn fwy cynhyrchiol.
“Ymunais â Chylch Ysgrifenwyr Llanelli, a wnaeth fy annog i ysgrifennu’r cerddi hyn. Mae’r llyfr, sy’n dwyn y teitl Memories, yn sôn am fy mhrofiadau bywyd, rhai’n ddigrif a rhai’n delio â galar.”
Dywedodd Claire Rumble, Swyddog Codi Arian Elusennau Iechyd Hywel Dda, elusen swyddogol Bwrdd Iechyd Prifysgol Hywel Dda: “Hoffem ddiolch yn arbennig iawn i Margaret am godi arian ar gyfer yr Uned Ddydd Cemotherapi yn Ysbyty Tywysog Philip.
“Mae cefnogaeth ein cymunedau lleol yn ein galluogi i ddarparu gwasanaethau y tu hwnt i’r hyn y gall y GIG ei ddarparu fel arfer ac rydym yn hynod ddiolchgar am bob rhodd a dderbyniwn.”
I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i www.hywelddahealthcharities.org.uk
