Gyda’r hydref ar drothwy’r drws a’r gaeaf yn gyflym agosáu rydym yn canolbwyntio’n llwyr ar baratoi ar gyfer heriau’r gaeaf sydd o’n Blaenau ochr yn ochr â’n cymunedau, staff, gwirfoddolwyr, gofalwyr a phartneriaid.
Mae dyfodiad y pandemig COVID wedi ein gorfodi i ymddwyn yn wahanol, mewn ffyrdd y mae llawer ohonom yn dal i geisio dod i arfer â nhw. Mae 2020 wedi bod yn flwyddyn y bu’n rhaid i ni newid yn sylfaenol ein ffordd o fyw, gweithio, rhyngweithio a gofalu am eim gilydd.
Yn drasig iawn, mae cost ddynol wirioneddol y pandemig yn parhau ac mae llawer o deuluoedd wedi colli anwyliaid cyn eu hamser. Mae llawer o rai eraill wedi goroesi, ond mae’r daith o adfer yn parhau iddynt – ac i ni.
Mae pawb yn naturiol wedi blino. Mae’r afiechyd yn adfywio ac rydym unwaith eto ar drothwy clo cenedlaethol ledled Cymru i helpu i atal y firws rhag lledaenu ac i ganiatáu i’n gwasanaeth iechyd ofalu am y nifer cynyddol o bobl a fydd yn mynd yn ddifrifol wael. Bydd hyn yn cael effaith ar ein staff a’n cymunedau. Mae’n effeithio ar wasanaethau’r GIG a gofal cymdeithasol ar adeg o’r flwyddyn pan mae gwasanaethau yn aml dan bwysau eithafol.
Mae ein gweithlu wedi gweithio’n ddiflino i newid y ffordd yr ydym yn darparu ein gwasanaethau ac yn gofalu am bobl. Rydym wedi gweithio’n galed i weithredu’n rhagweithiol ers dyfodiad y pandemig.
Yn y don gyntaf fe wnaethom sefydlu Unedau Profi Cymunedol cyntaf Cymru, a chanolfan reoli leol i ddarparu gwybodaeth ac arweiniad beirniadol i’n staff a’n partneriaid.
Fe wnaethom newid ein hamgylcheddau ysbyty, gofal sylfaenol a chymunedol i gadw at reoliadau newydd er mwyn cadw pobl yn ddiogel. Ar yr un pryd, rydym wedi parhau i ddarparu gofal brys a gofal critigol mewn ffyrdd diogel lle bo’r angen fwyaf.
Rydym wedi dod i ben â chael a dosbarthu Offer Amddiffyn Personol mewn marchnad fyd-eang heriol iawn. Fe wnaethom gyflenwi ysbytai maes ac rydym wedi cadw llawer o’r sylfaen fwy o welyau mewn paratoad ar gyfer ail don.
Mae datrysiadau digidol mewn gofal sylfaenol ac eilaidd wedi bod ar waith i drawsnewid y ffordd yr ydym yn rhyngweithio â’n cleifion ar y ffôn ac ar ddyfeisiau. Mae ein staff TGCh wedi dosbarthu dros 220 o lechi i helpu cleifion mewnol i gadw mewn cysylltiad â theulu a ffrindiau tra bod cyfyngiadau ar ymweld. Mae ein swyddogion cyswllt teulu yn ceisio cynnal y cyswllt hanfodol hwnnw ag anwyliaid.
Mae ein meddygon teulu, clinigwyr ysbytai, comisiynwyr cartrefi gofal a staff sydd wedi’u hadleoli yn parhau i gefnogi preswylwyr a staff ein cartrefi gofal, gan gynnwys rhaglen brofi enfawr.
Rydym wedi cyfrannu at ymchwil a datblygu i drin COVID19 a byddwn yn parhau i wneud hynny.
Bellach, mae gennym fwy o fynediad at brofion, gyda threfniadau gwell yn Aberystwyth a Llanelli. Mae capasiti lleol digonol i brofi, er gwaethaf rhai problemau gyda phorth y DU, ac rydym hefyd yn gweithio ar system fwy hybrid, i redeg ochr yn ochr â phorth y DU a fydd yn ein galluogi i gynnig mwy o brofion lleol i’n cymunedau.
Rydym wedi bod yn adeiladu ar ein strategaeth profi, olrhain, amddiffyn, trwy ein Cell Ymateb Rhanbarthol, ac rydym yn gweithio’n agos gydag Iechyd Cyhoeddus Cymru a phob un o’n partneriaid awdurdod lleol sy’n arwain y timau olrhain cyswllt lleol, gan ein helpu i ddod o hyd i glystyrau yn gynnar, a thorri cadwyni trosglwyddo. Mae dros 90% o’n cysylltiadau wedi cael eu holrhain yn llwyddiannus ac rydym yn diolch i chi i gyd am eich help parhaus wrth weithio gyda’n timau.
Rydym hefyd yn canolbwyntio ar ailsefydlu gofal dewisol lle y gallwn wrth i ni fyw ochr yn ochr â COVID19 ac mae hyn wedi cychwyn yn ein hysbytai. I lawer o bobl dyma fu’r prif effaith y pandemig arnynt. Rydym yn bwriadu cysylltu â phob unigolyn yn unigol i egluro pam bod oedi, beth allan nhw ei wneud i hunanreoli eu cyflwr, beth allan nhw ei wneud petai nhw’n dirywio a phryd y gallan nhw ddisgwyl eu llawdriniaeth.
Rydym yn gwybod y bydd effaith hyn yn cael ei deimlo am flynyddoedd i ddod, ond rydym wedi ein syfrdanu gyda’r gefnogaeth i’n Gwasanaeth Iechyd yn Hywel Dda.
Ar hyn o bryd, mae’n bwysicach nag erioed i amddiffyn rhag salwch anadlol ac mae ein meddygon teulu, ein fferyllwyr a’n timau’n gweithio’n ddiflino i alluogi pobl yn y grwpiau blaenoriaeth i gael y brechiad ffliw yn ddiogel.
Yn nhon gyntaf y pandemig roedd rhai pobl yn ofni defnyddio gwasanaethau gofal iechyd. Mae ein timau atal a rheoli heintiau, ein staff gofal tŷ a’n holl weithlu yn gwneud ein hysbytai mor ddiogel â phosib. Rydym yma i chi os ydych chi ein hangen ni.
Weithiau mae’n anoddach, wrth i amser fynd yn ei flaen, i gofio cadw at y pethau sylfaenol a fydd yn ein cadw’n fwy diogel. Sef:
• Cadw pellter corfforol bob amser (dau fetr).
• Gwisgo mwgwd neu orchudd wyneb pan fyddwch chi mewn mannau cyhoeddus dan do fel siopau.
• Golchi dwylo yn rheolaidd. Mae glanweithydd dwylo yn wych pan rydych chi allan.
• Aros gartref a threfnu i gael prawf os byddwch yn datblygu unrhyw un o’r symptomau canlynol: tymheredd uchel, peswch parhaus newydd a cholli neu newid blas neu arogl
Mae Llywodraeth Cymru wedi cydnabod ymdrechion Bwrdd Iechyd Hywel Dda yn ddiweddar trwy ein tynnu allan o ymyrraeth wedi’i thargedu. Mae hon yn deyrnged i’n holl staff a’u hymroddiad diflino a’u harbenigedd.
Daeth pob pandemig yn hanes y ddynoliaeth i ben. Bydd yr un hon yn dod i ben hefyd. Rydym yn barod am y gwaethaf ond yn gweithio i gael y canlyniadau gorau posib i’n poblogaeth. Gyda’n gilydd byddwn yn dod trwy’r gaeaf hwn yn gryfach nag erioed.
I bob un sydd wedi aberthu – diolch.
