Mae Nigel wedi trefnu diwrnodau golff elusennol ers 18 mlynedd, a chynhaliwyd digwyddiad eleni er budd yr uned ddydd Gwener, 15 Mai, yng Nghlwb Golff Ashburnham, lle mae’n aelod.
Wrth sôn am pam y penderfynodd godi arian ar gyfer yr uned, dywedodd Nigel: “Cafodd fy mab hynaf ei eni’n gynamserol a treuliodd wythnosau yn yr uned. Treuliodd fy merch amser yno hefyd ar ôl dal Strep B. Cafodd fy wyr, a drodd yn un oed ar 1 Mehefin, ei eni’n gynamserol hefyd a threuliodd ychydig wythnosau yn yr uned gofal arbennig i fabanod (SCBU).”
Roedd y digwyddiad codi arian yn wych; mwynhaodd pawb. Roedd y golff yn ardderchog ac yn gystadleuol. Cawsom adloniant gyda’r nos hefyd, ac aeth y cyfan yn ei flaen tan yn hwyr yn y nos.
Fy nod oedd codi rhwng £9,000 a £10,000, ac fe godwyd swm sylweddol o £10,050. Rwyf wedi fy nghyffwrdd yn aruthrol gan y gefnogaeth a’r swm a godwyd.
“Rwy’n ddiolchgar i Glwb Golff Ashburnham, yr holl fusnesau a noddodd y digwyddiad, fy nheulu a’m ffrindiau, y golffwyr, fy ngwraig am ei holl gefnogaeth, Stephen Aspin, Shane Davies a fy merch yng nghyfraith am helpu gyda’r broses gofrestru a chasglu arian.”
Dywedodd Kelly Brown, Arweinydd Allgymorth Newyddenedigol: “Hoffem fynegi ein diolch diffuant am eich haelioni anhygoel wrth godi arian ar gyfer yr Uned Gofal Arbennig i Fabanod yn Ysbyty Cyffredinol Glangwili.”
Rydym yn wirioneddol ddiolchgar eich bod wedi dewis cefnogi ein huned; bydd eich caredigrwydd yn gwneud gwahaniaeth ystyrlon i’r babanod a’r teuluoedd rydym yn gofalu amdanynt. Mae ymdrechion codi arian fel eich un chi yn ein helpu i wella ansawdd y gofal a’r profiad cyffredinol i’r rhai sydd angen ein cefnogaeth yn ystod cyfnod mor hollbwysig.
Dywedodd Claire Rumble, Swyddog Codi Arian: “Am swm anhygoel! Hoffem ddiolch yn fawr iawn i Nigel am drefnu diwrnod golff ar gyfer achos mor wych.”
Mae cefnogaeth ein cymunedau lleol yn ein galluogi i ddarparu gwasanaethau sy’n mynd y tu hwnt i’r hyn y gall y GIG ei ddarparu yn nhair sir Hywel Dda, ac rydym yn hynod ddiolchgar am bob rhodd a dderbyniwn.
I gael rhagor o fanylion am yr elusen a sut y gallwch chi helpu i gefnogi cleifion a staff lleol y GIG, ewch i hywelddahealthcharities.nhs.wales.
