Mewn ymateb i’r cynigion syfrdanol o gymorth yn ystod y pandemig COVID-19, mae Bwrdd Iechyd Prifysgol Hywel Dda, ein partneriaid mewn awdurdodau lleol a’r trydydd sector yn cyd-weithio i sicrhau bod yr ysbryd cymunedol eithriadol hwn yn helpu’r mwyaf bregus, ac yn cefnogi gwasanaethau’r Gwasanaeth Iechyd a gofal cymdeithasol.
Bydd gwirfoddolwyr, a chefnogaeth gan fusnesau a sefydliadau lleol, yn chwarae rhan hanfodol yn y frwydr yn erbyn COVID-19 ar draws Sir Gaerfyrddin, Ceredigion a Sir Benfro.
Dyma sut y gallwch wirfoddoli neu gynorthwyo’r Gwasanaeth Iechyd:
Os ydych am helpu eich Gwasanaeth Iechyd lleol yn ystod pandemig COVID-19, cysylltwch â Bwrdd Iechyd Prifysgol Hywel Dda drwy ffonio 0300 303 8322 neu mewn ebost i COVIDenquiries.hdd@wales.nhs.uk (ar agor 7am – 9pm, saith diwrnod yr wythnos). Mae’r Gwasanaeth Iechyd yn chwilio am wirfoddolwyr i gynnal tasgau syml ond pwysig megis cludo offer, bwyd a meddyginiaeth a chynorthwyo gwasanaethau a staff yr ysbytai.
I gadw ein staff a’r cleifion yr ydym yn gofalu amdanynt yn ddiogel, mae’n hanfodol ein bod yn rheoli’r holl eitemau sy’n cael eu cynnig mewn modd priodol a diogel. Os y credwch fod gennych adnoddau, nwyddau neu wasanaethau allai fod o ddefnydd i ni, cysylltwch â ni. Rhaid cyfeirio pob cynnig o gefnogaeth at y Bwrdd Iechyd ar 0300 303 8322 neu COVIDenquiries.hdd@wales.nhs.uk anda rhaid inni fynnu nad yw pobl yn ymweld â’n hysbytai i ollwng rhoddion.
Cofiwch – y peth pwysicaf oll y gall pob un ohonom ei wneud yn y frwydr yn erbyn coronafeirws yw aros gartref, er mwyn amddiffyn y Gwasanaeth Iechyd ac achub bywydau.
