Bydd Cabinet Cyngor Sir Gâr, yn eu cyfarfod ddydd Iau nesaf (Gorffennaf 31), yn ystyried rhoi sêl bendith i gynllun i adeiladu Ysgol Heol Goffa newydd gyda lle i 150 o ddisgyblion sydd ag Anghenion Dysgu Ychwanegol yn Llanelli. Mae hyn yn dilyn ystyriaeth drylwyr o adroddiad annibynnol a gomisiynwyd gan y cyngor am ddarpariaeth addysg arbennig yn ardal Llanelli, a thrafodaeth agored a manwl gyda llywodraethwyr Ysgol Heol Goffa, y staff a phartïon eraill sydd â diddordeb.
Bydd yr argymhelliad yn cael ei wneud gan y Cynghorydd Glynog Davies, Aelod Cabinet dros Addysg, a ddywedodd:
“Gallaf ddatgelu bod y Corff Llywodraethol wedi rhoi gwybod i ni y byddai’n cefnogi’r cyngor i fwrw ymlaen ag Opsiwn Pedwar yn yr adroddiad annibynnol – sef adeiladu ysgol newydd mwy, gyda lle i 150 o ddisgyblion sydd ag anawsterau dysgu cymedrol, difrifol neu ddwys. Mae’r opsiwn yma hefyd yn cael cefnogaeth y Pennaeth a staff yr ysgol. Rwy’ wir yn edmygu nhw am eu hamynedd a’u hagwedd resymol wrth ddod i’r casgliad hwn.
“Yn seiliedig ar hynny, rwy’n falch iawn o gyhoeddi mai dyma’r opsiwn y byddaf yn ei argymell i’r Cabinet ddydd Iau nesaf. Gellir adeiladu Ysgol Heol Goffa newydd sy’n fwy o faint na’r un bresennol mewn amserlen fyrrach na’r opsiwn arall o ddarparu ysgol i 250 o ddisgyblion i gynnwys disgyblion â Chyflyrau Sbectrwm Awtistig. Mae gwaith eisoes ar y gweill i ddarparu ar gyfer disgyblion ASC yn ardal Llanelli.
“Os bydd yr opsiwn a ffefrir yn cael ei dderbyn gan fy nghyd–aelodau ar y Cabinet ddydd Iau nesaf, bydd trafodaethau pellach yn cael eu cynnal gyda Llywodraeth Cymru i lunio cynllun busnes, gan y gallai ysgol arbennig newydd ar gyfer 150 o ddisgyblion gostio cymaint â £35m.
“Rhaid i mi bwysleisio petai ni wedi bwrw ymlaen â’r cynllun gwreiddiol i adeiladu ysgol newydd y llynedd, fel yr oedd llawer eisiau, byddai wedi bod yn llawn ar y diwrnod cyntaf. Bydd yr hyn sy’n cael ei argymell nawr yn ganlyniad llawer gwell i ddisgyblion, rhieni a staff.
“Ein blaenoriaeth fel cyngor yw sicrhau’r ddarpariaeth ADY orau ar gyfer disgyblion cenedlaethau’r dyfodol yn Llanelli, wedi’i gydbwyso gan alwadau eraill am ddarpariaeth addysgol gwell yn ardal Llanelli a rhannau eraill o’r sir, a gwerth am arian i’n trigolion.”
