Mae dysgwyr mewn ysgolion ledled de-orllewin Cymru wedi cael cipolwg ymarferol ar yrfaoedd yn y sector ynni glân trwy fenter newydd gan Gyrfa Cymru.
Mae heriau ‘Gwaith mewn Ffocws’, a ddatblygwyd gan Gyrfa Cymru mewn partneriaeth â Green GEN Cymru a’r Grid Cenedlaethol, yn helpu dysgwyr i archwilio ynni adnewyddadwy, datgarboneiddio, a’r sgiliau sydd eu hangen ar gyfer swyddi yn y dyfodol yn y sector ynni.
Cynhaliwyd un o’r digwyddiadau yn ddiweddar yn Ysgol Gatholig Sant Ioan Llwyd yn Llanelli, lle cymerodd disgyblion Blwyddyn 7 ran mewn her a gynlluniwyd i ddatblygu eu sgiliau cyfathrebu perswadiol. Edrychodd y dysgwyr ar waith Green GEN Cymru a recordio podlediadau yn trafod manteision a heriau prosiect ynni adnewyddadwy, gan eu helpu i ddatblygu sgiliau cyfathrebu wrth ddysgu am y gyrfaoedd sy’n gysylltiedig â dyfodol gwyrdd Cymru.
Yn Ysgol Gyfun Emlyn yng Nghastell Newydd Emlyn, Sir Gaerfyrddin, bu disgyblion Blwyddyn 8 yn gweithio gyda Green GEN Cymru i ddatblygu eu sgiliau cyfathrebu perswadiol trwy dasg diwydiant go iawn. Ar ôl dysgu am y sefydliad a’r ystod o rolau o fewn y sector, bu’r dysgwyr yn gweithio mewn timau i edrych ar fanteision ac anfanteision gwahanol systemau ceblau trydanol, gan gynnwys peilonau, ceblau tanddaearol a pholion telegraff.
Gyda chefnogaeth gweithwyr proffesiynol y diwydiant yn yr ystafell ddosbarth, datblygodd y dysgwyr eu syniadau a chyflwyno eu canfyddiadau i banel, gyda dau dîm yn cael eu henwi’n gyd-enillwyr am gryfder eu cyflwyniadau terfynol.
Cefnogwyd y fenter hefyd gan sefydliad Diwydiant Sero Net Cymru, a helpodd i recriwtio’r cwmnïau a oedd yn cymryd rhan.
Dywedodd Aled Evans, cynghorydd cyswllt busnes yn Gyrfa Cymru: “Mae gweithio gyda chyflogwyr ledled de-orllewin Cymru yn caniatáu inni ddod â phrofiadau diwydiant go iawn i’r ystafell ddosbarth a helpu dysgwyr i ddeall sut mae’r sgiliau maen nhw’n eu datblygu yn yr ysgol yn berthnasol i gyfleoedd gyrfa yn y dyfodol.
“Rydym yn ddiolchgar i Green GEN Cymru a’r Grid Cenedlaethol am gefnogi’r heriau hyn a rhannu eu harbenigedd gyda dysgwyr. Mae’r gweithgareddau’n helpu pobl ifanc i edrych ar ynni adnewyddadwy, datgarboneiddio a gyrfaoedd gwyrdd yn y dyfodol, gan gael cipolwg ar yr heriau sy’n wynebu’r sector heddiw.”
Mae heriau ‘Gwaith mewn Ffocws’ wedi’u datblygu gyda chyflogwyr o sectorau twf allweddol ac wedi’u cynllunio i gefnogi Cwricwlwm i Gymru drwy gysylltu dysgu yn yr ystafell ddosbarth â heriau go iawn yn y diwydiant. Maent hefyd yn helpu pobl ifanc i fagu sgiliau hanfodol fel cyfathrebu, gwaith tîm a meddwl yn feirniadol.
Drwy gydweithio’n agos â phartneriaid fel Green GEN Cymru a’r Grid Cenedlaethol, mae Gyrfa Cymru yn anelu at roi dealltwriaeth gliriach i ddysgwyr o ddiwydiannau sy’n dod i’r amlwg ac ar yr un pryd helpu cyflogwyr i chwarae rhan uniongyrchol yn llunio gweithlu’r dyfodol.
I gael rhagor o wybodaeth am ddigwyddiadau yn y dyfodol ac adnoddau, ewch i wefanGyrfa Cymru.
