Gyda thristwch mawr bu i Gyngor Tref Llanelli nodi marwolaeth y cyn -gynghorydd Tref a Sir Dyfrig Thomas ar ddydd Sul y 1af o Ionawr.
Roedd Dyfrig yn aelod o Gyngor y Dref am flynyddoedd lawer gan gynrychioli Ward Tyisha o 1999 tan 2004 a Ward Bigyn yn y cyfnod 2008 – 2017. Bu hefyd yn Faer Tref Llanelli yn y flwyddyn 2010 – 2011.
Yn ystod yr amser yma fe wasanaethodd Dyfrig ei gymunedau yn rhagorol dros ben. Roedd parch mawr gan ei gyfeillion a staff y Cyngor amdano ac yr oedd bob amser ar gael i Gynghorwyr profiadol a rhai oedd newydd eu hethol ar gyfer darparu cyngor, arweiniad a chyfeillgarwch ar draws y siambr. Roedd hefyd yn gyn-lywodraethwr ysgolion Coedcae a Maesllyn.
Roedd gan Dyfrig Radd Anrhydedd o Brifysgol Aberystwyth ac am amser maith roedd yn ymgyrchydd brwd dros gyfiawnder cymdeithasol a thros Gymru. O ganlyniad i’w ymrwymiad a’i angerdd dros yr iaith Gymraeg ei diwylliant a’i threftadaeth, agorodd siop lyfrau Cymraeg cyntaf Llanelli, sef “Siop y Werin” ar Stryd y Farchnad.
Mae Cyngor y Dref yn estyn ei gydymdeimlad dwysaf i deulu a ffrindiau Dyfrig yn ystod yr amser anodd hwn.
